மொட்டை மாடியில் மிளகாய் வற்றலைக் காயப்போட்டுக்கொண்டிருந்த பர்வதத்துக்கு, இன்னும் எதற்காக, யாருக்காக இப்படி வேலை செய்ய வேண்டுமென்ற சலிப்பு மேலிட்டது. பஞ்சாயத்துப் பள்ளிக்கூடத்தில் ஆசிரியராகப் பணியாற்றி வந்த அவளது கணவன் தேவநாதன் மாரடைப்பால் காலமாகி இரண்டு வருடங்கள் ஆகி விட்டன. தந்தைக்குக் கருமம் செய்ய வேண்டிய பொறுப்பு வந்திருந்ததால், வீட்டில் வயதுக்கு வந்த ஒரு பெண்ணிருக்கும்போதே மகன் பிராபகருக்கு, அவசர அவசரமாகத் திருமணம் செய்து வைக்க வேண்டியதாயிற்று. கணவனின் பூர்வீக சொத்தான வீடு, நிலம், தோப்பு எல்லாவற்றையும் விலைபேசி முன்பணமும் கைமாறியாகி விட்டது. பத்திரப்பதிவு முடிந்தபிறகு, மூட்டை முடிச்செல்லாம் கட்டிக்கொண்டு, பட்டணத்துக்குப் போய், மகன் வீட்டில் மருமகள் கைச்சமையலைச் சாப்பிட்டுக்கொண்டு ’ஹாயாக’ இருக்க வேண்டிய வயதில், இன்னும் அவள் சுறுசுறுப்பாக எதையோ செய்து கொண்டிருந்தாள்.
